 Молитва о получении прощения
Господи Иисусе Христе, Боже наш. Боже всякаго милосердия и щедрот, Егоже милость безмерна и человеколюбия неизследимая пучина, ко Твоему Величеству припадающе, со страхом и трепетом яко раби недостойнии благодарение Твоему благоутробию о Твоих благодеяниих на рабех Твоих бывших, ныне смиренно приносяще, яко Господа, Владыку и Благодетеля славим, хвалим, поем и величаем, и припадающе паки благодарим. Твое безмерное и неизреченное милосердие смиренно моляще. Да якоже ныне моления рабов Твоих прията, и милостивно исполнити сподобил еси, и во предняя в Твоей и искренняго любви и во всех добродетелех преспевающих. Твоя благодеяния всех верных Твоих получити. Церковь Твою Святую и град сей (или весь сию), от всякаго злаго обстояния избавляя, и мир и безмятежие тем даруя. Тебе со Безначальным Твоим Отцем, и Пресвятым и Благим и Единосущным Твоим Духом, во едином существе славимому во веки веков. Аминь. Молитва перед началом добраго Дела Боже Великий, Дивный, неисповедимою благостию и богатым Промыслом управляя всяческая, Егоже премудрыми, но неиспытанными судьбами разнообразныя пределы жизнь и сожительство человеческое приемлет! Приклони ухо Твое с высоты святыя Твоих, сердцем и усты ныне возносимыя тебе моления наша благоприятны, яко кадило благовонное, и ниспосли всегда, яко щедр, рабом Твоим (имена) богатыя милости и щедроты Твоя. Благослови благое намерение совета их и в совершение его произведи. Сохрани их в мире, единомыслии и любви, ниспосли им Ангела Своего хранителя, наставляюща, заступающа и невредимо соблюдающа их от всякаго злаго обстояния; умножи лета живота их в нерушимом здравии и непременяемом благополучии. О, Премилосердый Господи, Боже щедрот и Отче всякия утехи! Не отврати Лица Твоего от нас и не посрами нас в уповании нашем. Уповающе на Тя, молимся Тебе и молящеся, на щедроты Твоя уповаем. Ты бо един веси, еже требуем и прежде прошения подаеши и дарования утверждаеши и всяческое даяние благо и всяк дар совершен свыше есть, сходяй от Тебе Отца Светов и Тебе славу возсылаем, со Единородным Твоим Сыном и Всесвятым и Благим и Животворящим Твоим Духом, ныне и присно и во веки веков. Аминь. Молитва перед учением Господи Боже и Создателю наш, образом Своим почтый нас человеки, научивыйизбранные Твоя, яко дивитися внемлющим учению Твоему, открывый премудрость младенцем. Иже Соломона и всех взыскующих премудрости Твоей научивый, отверзи сердца, умы и усты рабов Твоих сих, во еже прията силу Закона Твоего, и со успехом познати преподаемыя им полезная учения, во славу Пресвятаго Имени Твоего, в пользу и созидание Святей Твоей Церкви, и разумети благую и совершенную волю Твою. Избави их от всякаго налога вражия, соблюди их в Православии и вере, и во всяком благочестии и чистоте во вся дни живота их, да преуспеют в разуме и во исполнении Заповедей Твоих, да тако предуготовани прославят Пресвятое Имя Твое, и будут наследницы Царствия Твоего. яко Ты еси Бог силен в милости, и благ в крепости, и Тебе подобает всякая слава, честь и поклонение. Отцу и Сыну и Святому Духу, всегда, ныне и присно и во веки веков. Аминь. |
